Tegese Tembung

Kempel = saged keket boten gampil buyar, kadosta: lempung
Ngrempel = ngempal dados sapanggènan tumrap tetuwuhan (ingkang cacahipun sekedhik)
Ngrompol = ngempal dados sapanggènan tumrap tetuwuhan (ingkang cacahipun kathah). Ugi kénging tumrap tiyang utawi kéwan. Ngrompol = nggrombol.
Nggrembel = ngempal dados sapanggènan tumrap tetuwuhan alit-alit ingkang kathah ronipun.
Nggrombol = ngempal dados sapanggènan tumrap tetuwuhan ingkang radi ageng lan kathah ronipun; ugi tumrap tiyang utawi kéwan.
Grumbul = ngempal dados sapanggènan tumrap tetuwuhan ingkang radi ageng lan kathah ronipun.
Ngrempoyok = kathah lan dhedhompolan tumrap woh utawi sekar.
Ketel = kathah lan kerep, tumrap rambut utawi ron.
Mbiyet = kathah lan kerep, tumrap woh.
Ngrembuyung = kathah lan kerep, tumrap ron.
Rungkud = ketel sarta kathah tetuwuhanipun.
Njembrung = ketingal reged jalaran ketuwuhan rumput kathah, kadosta: plataranipun njembrung. Yèn tumrap jogan (jogan njembrung) = reged jalaran kathah uwuhipun.
Kerep = celak sanget antawisipun (tumrap tanaman, panabuhipun gamelan lsp.)
Rengked = kerep sanget (boten renggang), kadosta tumrap nam-naman.

(Padmosoekotjo, Memetri Basa Jawi III, hal. 82)